maharashtra

महाराष्ट्रासाठी ५० हजार रेमडेसिवीर इंजेक्शन उपलब्ध करून देणार भाजप

Share Now


मुंबई – रेमडेसिवीरचा राज्यात निर्माण झालेला तुटवडा व त्यामुळे रुग्णांची होत असलेली गैरसोय या पार्श्वभूमीवर भाजप नेत्यांनी विविध औषध कंपन्यांकडे चाचपणी करून इंजेक्शन मिळवण्याच्या प्रयत्नाचा एक भाग म्हणून आज (सोमवार)दमणला धाव घेतली. भाजपकडून ५० हजार रेमडेसिवीर इंजेक्शन दमणच्या भेटीनंतर महाराष्ट्रासाठी उपलब्ध करून देण्याची घोषणा विधान परिषद विरोधी पक्षनेते प्रविण दरेकर यांनी केली आहे.

कोरोना रुग्णांची संख्या महाराष्ट्रात झपाट्याने वाढत असल्यामुळे राज्यातील आरोग्य यंत्रणा कोलमडण्याच्या मार्गावर आहे. कोरोना रुग्णांची हेळसांड सुरू असून दिवसेंदिवस परिस्थिती बिकट होत चालली आहे. रेमडेसिवीरचा राज्यात काळाबाजार होत असल्याचेही दिसून येत आहे. तर, राज्यातील रेमडेसिवीरचा तुटवडा पाहता विरोधी पक्षनेते देवेंद्र फडणवीस यांनी काही औषध उत्पादक कंपन्यांशी चर्चा केली होती. त्या अनुषंगाने दमण येथील ग्रुप फार्मा प्रा. लि. या कंपनीशी चर्चा करण्यासाठी आज विधान परिषद विरोधी पक्षनेते प्रवीण दरेकर व भाजप आमदार प्रसाद लाड यांनी दमणला धाव घेतली.


महाराष्ट्राला लागेल तितका रेमडेसिवीरचा साठा देण्याचे आश्वासन ग्रुप फार्मसीचे मालक अंशू यांनी दिले असून केंद्र सरकारला देशभरात वाटप करण्याची परवानगी मिळवण्यासाठी अर्जही केला आहे. केंद्राकडून परवानगी मिळताच महाराष्ट्रात रेमडेसिवीर इंजेक्शनचे वाटप सुरू करण्यात येईल, अशी माहिती दरेकर यांनी दमण येथून दिली आहे.

आरोग्य व्यवस्थेचा कोरोना काळात पुरता बोजवारा उडाला असल्यामुळे महाराष्ट्रातील जनता भयभीत झाली आहे. आरोप, प्रत्यारोपाचा खेळ राज्य सरकारने करण्यापेक्षा आरोग्य व्यवस्था मजबूत करण्यात वेळ घालवला असता तर आज ही वेळ आली नसती, असा आरोप करून महाराष्ट्राप्रती असलेल्या कर्तव्य भावनेतून भाजप कोरोनाबाधितांची मदत करीत असल्याचे दरेकर यांनी सांगितले.

तसेच, ग्रुप फार्मा प्रा. लि. या कंपनीने दिलेल्या रेमडेसिवीरमुळे देखील रुग्णांची मोठ्या प्रमाणावरील असलेली मागणी पूर्ण करता येईल, असा विश्वासही दरेकर यांनी व्यक्त केला आहे. दमणच्या या भेटीत त्यांच्या समवेत भाजप आमदार प्रसाद लाड आणि दमणचे खासदार लालु पटेल व इतर स्थानिक लोकप्रतिनिधी उपस्थित होते.

The post महाराष्ट्रासाठी ५० हजार रेमडेसिवीर इंजेक्शन उपलब्ध करून देणार भाजप appeared first on Majha Paper.

from Majha Paper https://ift.tt/3wYVN4u
via IFTTT


Share Now
error: Content is protected !!